17 vjeçari kapet me drogë afër kësaj shkolle

Abuzimi me substanca narkotike nga të rinjtë mbetet një shqetësim i madh në shoqërinë kosovare. Varësia nga droga sa vjen e shtohet dhe kjo dëshmohet çdo ditë me kapjen dhe arrestimin e dhjetëra personave konsumues e shpërndarës të substancave narkotike.

Së fundmi, Policia në kuadër të Planit Operativ “Siguria në Shkolla” ka realizuar një kontroll në rrugën Beqir Kastrati në Gjakovë, afër shkollës teknike “Nexhmedin Nixha”.

Burime të Sinjalit bëjnë me dije se është kapur një i mitur, E. M., rreth 17-vjeçar, tek i cili janë gjetur një qese me rreth 2 gramë marihuanë, një mulli i vogël (grinder) dhe një pako rizlla.

I dyshuari është shoqëruar në zyrat e DHTN-së për intervistim, ndërsa sendet e gjetura janë sekuestruar si prova materiale.

Prokurori kujdestar nga Prokuroria Themelore Gjakovë ka urdhëruar që i mituri të lirohet në procedurë të rregullt.