Fëmija 3-vjeçar rrahet brutalisht në kopsht nga edukatorja

Një nënë e shqetësuar ka denoncuar publikisht në faqen “JOQ Albania” një rast të rëndë dhune që, sipas saj, i është ushtruar djalit të saj 3-vjeçar në kopshtin privat “Qendra Siar”, në Mëzez-Fushë, nën drejtimin e Erviola Trukës.

Ajo ka rrëfyer se pas një dite normale në kopsht, është përballur me drejtoreshën e institucionit e cila i kishte thënë se kishte ndodhur një “gabim”. Në atë moment, nëna ka vënë re se fytyra e fëmijës ishte e mbuluar me krem, ndërsa më vonë i është shpjeguar se ishte përfshirë në një konflikt mes fëmijëve, raporton PodujevaSot.net.

Dy ditë pas ngjarjes, nëna ka zbuluar se fëmija tjetër, me të cilin thuhej se ishte konfliktuar djali i saj, nuk kishte as dhëmbët e parë, duke ngritur dyshime të forta se dhuna ndaj të birit ishte ushtruar nga edukatoret. Sipas saj, fëmija është goditur me shuplakë nga punonjëset e kopshtit.

Prindi ka kërkuar vazhdimisht akses në pamjet e kamerave të sigurisë, por thotë se është përballur me refuzim dhe premtime të pambajtura nga drejtuesja e kopshtit. Madje, më pas ka marrë mesazh që të mos e sillte më fëmijën në këtë institucion, ndërkohë që edukatorja që kujdesej për të ishte larguar nga puna, raporton PodujevaSot.net.

Sipas nënës, drejtoresha ka nisur edhe një fushatë denigruese ndaj fëmijës, duke e etiketuar si “agresiv” para prindërve të tjerë dhe duke dërguar familjes mesazhe kërcënuese e mallkime.

Prindi kërkon përgjegjësi dhe transparencë, duke apeluar për kontrolle më të rrepta dhe standarde më të larta në institucionet arsimore që kujdesen për fëmijët.