Yakin: Kosova tash është më e fortë se herën e fundit

Kombëtarja e Kosovës nesër do ta luaj ndeshjen e parë kualifikuese për Kampionatin Botëror kundër Zvicrës.

Në lidhje me ndeshjen e nesërme, trajneri i kombëtares së Zvicrës, Murat Yakin, ka dhënë një intervistë për gazetarin dhe drejtorin e sportit në Artmotion, Arlind Sadikun, ku ka folur për një sërë çështjesh.

Yakin u pyet për cilësinë e kombëtares së Kosovës, ku tha se tani është kombëtare më e fortë sesa herën e fundit kur janë përballur së bashku.

“Kanë pasur zhvillim të mirë në ekip dhe po ashtu kanë lojtarë të mirë. Herën e fundit, disa prej lojtarëve më të mirë nuk luajtën, andaj mendoj se tani janë më të fortë”, tha Yakin për Klan Kosova.

Trajneri i Zvicrës u pyet edhe për çështjen ku shumë futbollistë shqiptarë të Zvicrës po e shohin të ardhmen te Kosova, gjë për të cilën tha se te Zvicra konkurrenca është e madhe.

“Konkurrenca është e madhe. Kemi shumë lojtarë që gjenden në këtë situatë. Në fund i zgjedh lojtarët më të mirë dhe kemi shumë nga të gjitha vendet”.

“Nesër do të ketë ndeshje të hapur. Jam shumë i lumtur që e luajmë përsëri këtë ndeshje sepse edhe Kosova ka lojtarë shumë të mirë, kanë treguar performanca shumë të mira, andaj jam shumë i lumtur që luajmë kundër tyre nesër”, tha Yakin.