Babai rrah djalin 10 vjeçar me kabllo, kjo është arsyeja

Numri i rasteve të dhunës në familje ka marrë përmasa shqetësuese në vendin tonë, pasi çdo ditë persona të ndryshëm përfundojnë në pranga si të dyshuar për dhunë ndaj familjarëve. Këto raste bëhen edhe më të rënda, kur viktima janë fëmijët të cilët përjetojnë dhunë psikike e fizike nga prindërit e tyre, raporton Gazeta Sinjali.

Një rast i tillë është regjistruar në fshatin Dubravë të Ferizajt, ku një fëmijë 10-vjeçar është dhunuar fizikisht nga babai i tij.

Sinjali mëson se i dyshuari F. M, rreth 38-vjeçar, pas tensioneve të vazhdueshme me djalin e tij, ka ushtruar dhunë fizike ndaj tij.

Shkak për këtë dyshohet të kenë qenë mungesat në shkollë, shmangia e detyrave mësimore, shoqërimi me persona të papërshtatshëm, madje edhe dyshimet se i mituri kishte filluar të kërkonte lëmoshë, të konsumonte cigare dhe substanca narkotike.

Rasti është zbuluar pasi psikologia e shkollës që ndjek viktima e ka vërejtur me shenja të dhunës dhe pas bisedës me të ka kuptuar ngjarjen, duke e raportuar menjëherë në Polici.

Me urdhër të Prokurorit të Shtetit, është iniciuar rasti penal për veprën “Dhuna në familje”.