Pamje të tmerrshme: Shqiptarët gjuhen me armë zjarri për një vend parkimi

Një ngjarje e rëndë ka ndodhur mbrëmjen e djeshme në Kukës, ku një debat i nisur për një vend parkimi ka përfunduar me të shtëna me armë zjarri, duke terrorizuar banorët e lagjes nr. 5.

Në pamjet e siguruara nga JOQ Albania shihet momenti kur një prej personave të përfshirë në konflikt nxjerr armën dhe qëllon drejt kundërshtarit të tij. Fatmirësisht plumbi nuk e ka kapur, por rreziku ka qenë real për jetën e tij dhe të qytetarëve që ndodheshin aty pranë.

Ajo që e bën edhe më shqetësuese situatën është fakti se në rrugë shihen edhe fëmijë dhe banorë të tjerë, të cilët në çdo moment mund të ishin bërë viktima të një tragjedie të mundshme. Ky veprim i papërgjegjshëm ka shkaktuar panik në zonë, duke treguar edhe një herë se sa lehtë mund të rrezikohet jeta e qytetarëve të pafajshëm nga konflikte banale.

Sipas njoftimit zyrtar të Policisë, rreth orës 20:50, shtetasi U. D. është konfliktuar me shtetasin A. A. dhe gjatë sherrit ka qëlluar me armë zjarri. Autori është shpallur në kërkim, ndërsa grupi hetimor po punon për zbardhjen e plotë të ngjarjes.

Fatmirësisht, nga të shtënat nuk ka persona të lënduar, por rreziku ka qenë maksimal si për të përfshirët në konflikt, ashtu edhe për banorët kalimtarë të rastit.