Uji që vjen nga ky liqen u raportua të mos pihet për shkak të manganit që përmban – por çfarë dëmi ka në shëndet?

Instituti Kombëtar i Shëndetësisë Publike të Kosovës ka paralajmëruar ngritje të nivelit të manganit në ujin që furnizohet nga liqeni i Badocit. Për këtë arsye, qytetarëve të zonave të prekura u është bërë apel që të mos e përdorin ujin për pije deri në njoftimin e radhës.

Sipas IKSHPK-së, ndotja me mangan është ndotje kimike, prandaj edhe vlimi i ujit nuk e eliminon atë. Uji mund të shfrytëzohet vetëm për pastrim dhe higjienë, por jo për konsum, raporton PodujevaSot.

Ekspertët theksojnë se mangani është një mineral që gjendet natyrshëm në tokë dhe ujë, por në përqendrime të larta, mbi 0.05 mg/L, mund të shkaktojë probleme serioze. Rreziku më i madh i kanoset fëmijëve dhe të rriturve që konsumojnë për një kohë të gjatë ujë të tillë.

Foshnjat janë edhe më të ndjeshme, pasi mund të përballen me vështirësi në të mësuar dhe sjellje. Edhe pse pirja e ujit me mangan mbi nivelin e lejuar është e rrezikshme, përdorimi i tij për larje ose pastrim nuk paraqet ndonjë problem shëndetësor, raporton PodujevaSot.