Gjykata Kushtetuese rrëzon ankesën e Përparim Ramës

Gjykata Kushtetuese e Kosovës ka rrëzuar ankesën e kryetarit të Prishtinës, Përparim Rama, për Rregulloren për Menaxhimin e Mbeturinave.

Kushtetuesja ka vlerësuar se ankesa e të parit të Prishtinës nuk e përbush kriterin e parë të pranueshmerisë.

Sipas vendimit të Kushtetueses, rregullorja në fjalë nuk është as ligj dhe as akt i miratuar nga Qeveria.

“Andaj, duke marrë për bazë atë që akti i kontestuar nuk përmbush kriterin e parë të pranueshmërisë, meqenëse nuk është as ligj dhe as akt i miratuar nga Qeveria, Gjykata nuk vazhdoi me vlerësimin nëse Rregullorja e kontestuar, e miratuar nga Kuvendi Komunal, mund të ketë cenuar përgjegjësitë komunale ose zvogëluar të hyrat e saj, siç është përcaktuar në paragrafin 4 të nenit 113 të Kushtetutës”, thuhet në vendimin e Gjykatës Kushtetuese, raporton Kallxo.com

I pari i Prishtinës, Përparim Rama, kishte kërkuar nga Gjykata Kushtetuese vlerësimin e kushtetueshmërisë së Rregullores për ndryshimin dhe plotësimin e Rregullores për Menaxhimin e Mbeturinave, e cila ishte miratuar nga Kuvendi i Prishtinës.

Komuna e Prishtinas pretendonte se kjo rregullore nuk ishte në përputhje me disa nga nenet e Ligjit për Vetëqeverisje Lokale.