Konfirmohet raportimi i PodujevaSot, i riu vdes pas rrokullisjes së traktorit

Policia e Kosovës ka konfirmuar për PodujevaSot lajmin për ngjarjen tragjike të ndodhur sot paradite në fshatin Zemanic të Leposaviqit, ku një 16-vjeçar ka humbur jetën pasi traktori me të cilin po punonte është rrotulluar.

Sipas njoftimit zyrtar, rasti është raportuar rreth orës 11:00 nga Qendra Kryesore e Mjekësisë Familjare në Leposaviq. Në vendngjarje kanë dalë njësitet policore, ndërsa nga stafi mjekësor është konstatuar vdekja e të miturit.

Viktima është identifikuar si D.P., 16 vjeç. Sipas dëshmitarëve, ai ishte duke tërhequr një lis me traktor kur mjeti është rrotulluar, duke e zënë përfund.

Prokurori i Shtetit ka urdhëruar inicimin e rastit si “Vdekje e dyshimtë”, ndërsa trupi i pajetë i viktimës i është dorëzuar familjarëve.