Ekskluzive: Zyrtar i KEDS-it dyshohet për marrje ryshfeti

Gazeta Sinjali ka mësuar për një rast të ndjeshëm që ka ndodhur sot në Gjilan, ku një zyrtar i KEDS-it dhe një qytetar janë përfshirë në një konflikt që ka rezultuar me dy raste të veçanta penale.

Burimet e Sinjalit bëjnë me dije se më 17 shtator 2025, rreth orës 11:55, në rrugën “Avdulla Presheva”, një qytetar ka akuzuar zyrtarin e KEDS-it, për marrje ryshfeti.

Sipas deklaratës, ai i kishte dhënë zyrtarit 50 euro – prej të cilave 30 për shlyerjen e një borxhi të rrymës dhe 20 euro për një shërbim privat. Por pasi verifikoi se vetëm 30 euro ishin paguar për borxhin, ai është revoltuar dhe ka kërkuar llogari nga zyrtaru, duke e akuzuar për përvetësim të shumës prej 20 eurosh.

Nga ana tjetër, zyrtari ka pranuar se ka kryer një shërbim privat jashtë detyrës së tij zyrtare dhe për këtë ka marrë 20 euro, ndërsa pjesën tjetër e ka përdorur për pagesën e faturës së rrymës.

Të dy janë shoqëruar në stacionin policor për intervistim dhe pas konsultimit me Prokurorinë janë iniciuar dy raste të ndara: një për sulm dhe një për marrje ryshfeti.

Hetimet lidhur me këtë ngjarje janë duke vazhduar.