Doli nga burgu, 27 vjeçari shqiptar plagos një femër

Një 27-vjeçar shqiptar ka plagosur me thikë një turiste 25-vjeçare nga Ukraina në zonën e Kasandrës, në Halkidiki të Greqisë. Ngjarja e rëndë ka ndodhur në një banesë në zonën e Kipsës, ku i riu Ylli Shkalla është futur për të grabitur.

Autoritetet greke shprehen se ai ka vjedhur 2,000 euro dhe një celular, dhe pas kësaj ka qëlluar me thikë ukarainasen duke i shkaktuar plagë të rënda. E reja është transportuar për në qëndrën shëndetësore të Kasandrës, ku edhe po merr ndihmë mjeksore.

Policia greke ka nisur një operacion të gjerë për kapjen e autorit, i cili rezulton të jetë arratisur vetëm një ditë më parë nga burgu bujqësor i Kasandrës. Ylli Shkalla, me origjinë nga Tirana, ishte duke vuajtur një dënim në regjim gjysmë të lirë, ku ishte i angazhuar në punë të ndryshme brenda burgut.

Ai nuk është i panjohur për autoritetet shqiptare, pasi në vitin 2017 është arrestuar për bashkëpunim në 9 raste vjedhjesh në kryeqytet.

Autoritetet greke vazhdojnë kërkimet, ndërkohë që ngjarja ka shkaktuar shqetësim në zonë dhe midis turistëve.