Ky është personi që humbi jetën në aksident

Në Gjakovë mbrëmë ka ndodhur një aksident i rëndë trafiku me pasoja tragjike, ku një 66-vjeçar ka humbur jetën si rezultat i vetë-aksidentit.

Rreth orës 23:15 në rrugën nacionale Klinë–Gjakovë, pranë restorantit “Kalaja”, 66-vjeçari Nikoll Prenkaj ishte duke drejtuar veturën e tipit “VW Polo” kur humbi kontrollin mbi automjetin, raporton Podujeva Sot.

Sipas hetimeve fillestare, automjeti ka kaluar nga shiriti i djathtë në të majtin dhe ka dalë jashtë rruge. Vetura është përplasur me rrethojat metalike e më pas me vazo betoni në hapësirat e restorantit, duke shkaktuar dëme të mëdha materiale.

Viktima fatkeqësisht ka ndërruar jetë në vendngjarje, ku vdekja e tij është konstatuar nga mjeku kujdestar që doli menjëherë në terren, raporton Podujeva Sot.

Prokurori kujdestar i shtetit ka dalë në vendin e ngjarjes dhe me urdhër të tij trupi i pajetë është dërguar për obduksion në IML-Prishtinë.