Xhafer Tahiri premton ngrohtoren e qytetit

Kandidati për kryetar të Vushtrrisë, Xhafer Tahiri, ka theksuar se projekti i ngrohtores së qytetit do të jetë një nga prioritetet kryesore të mandatit të tij.

Ai bashkë me asambleisten Leonora Gërguri u takua me qytetarët e Vushtrrisë, ku prezantoi detajet e planit.

Tahiri tha se ngrohtorja është domosdoshmëri për qytetin, pasi ruan ambientin dhe njëkohësisht ul ndjeshëm koston e ngrohjes për familjet gjatë dimrit.

Sipas tij, investimi në fazën e parë kap vlerën prej 3 milionë euro, shumë më e ulët se kostoja e parkingut nëntokësor të ndërtuar me beton. “Fillojmë nga mahalla e Sheqerave dhe brenda mandatit e përfundojmë të gjithë projektin me fonde nga BERZH”, ka deklaruar Tahiri.

Ai shtoi se ky projekt nuk është vetëm ekonomik, por edhe ekologjik, pasi do të ndikojë në uljen e ndotjes dhe përmirësimin e cilësisë së jetesës në qytet.