Deputetja shqiptare Olta Xhaçka u zgjodh zëvendëspresidente e Asamblesë Parlamentare të Këshillit të Evropës

Përmes një vendimi unanim, Shqipëria ka fituar një përfaqësim të lartë në Asamblenë Parlamentare të Këshillit të Evropës. Deputetja shqiptare është zgjedhur në postin e Zëvendës Presidentes së këtij institucioni prestigjioz, duke i dhënë vendit një rol të rëndësishëm në arenën evropiane.

Në fjalën e saj pas zgjedhjes, ajo u shpreh se kjo nuk është vetëm një detyrë e re personale, por një mesazh i qartë se “Shqipëria ka zë, peshë dhe vizion” brenda strukturave evropiane.

“Ky besim më ngarkon me përgjegjësi të qarta: të forcoj zërin e vendit tim në mbrojtje të demokracisë, sundimit të ligjit dhe të drejtave të njeriut”, theksoi ajo.

Ajo shtoi se do të angazhohet fuqishëm për të mbështetur Kosovën në rrugën e saj drejt anëtarësimit në Këshillin e Evropës, për të qëndruar pranë Ukrainës në përpjekjet për paqe dhe drejtësi, si dhe për të nxitur reformat që e forcojnë rolin e Shqipërisë si partnere e besueshme.

Kjo zgjedhje shihet si një hap i rëndësishëm në afirmimin e Shqipërisë në skenën evropiane dhe një mundësi për të ndikuar drejtpërdrejt në vendimmarrjet që lidhen me demokracinë, lirinë dhe të drejtat e njeriut.