Publikohet aktgjykimi i Gjykatës Kushtetuese për Kuvendin e Kosovës

Gjykata Kushtetuese pas tetë ditësh që kur ka nxjerrë njoftimin se nuk është konstituuar Kuvendi i Kosovës, të mërkurën publikoi aktgjykimin e plotë.

Gjykata ka konstatuar se seanca konstituive e Kuvendit, e filluar me 15 prill 2025 nuk ka përfunduar si rezultat i moszgjedhjes së nënkryetarit të Kuvendit nga radhët e deputetëve të komunitetit serb, dhe Kuvendi nuk është konstituuar në pajtim me përcaktimet e paragrafit 1 të nenit 66 [Zgjedhja dhe Mandati] dhe paragrafët 1 dhe 4 të nenit 67 [Zgjedhja e Kryetarit dhe Nënkryetarëve] të Kushtetutës së Republikës së Kosovës.

Kushtetuesja ka urdhëruar të gjithë deputetët e zgjedhur të Kuvendit të Republikës së Kosovës që gjatë procedurës së zgjedhjes së nënkryetarit të Kuvendit të Republikës së Kosovës nga radhët e deputetëve të komunitetit Serb, të ushtrojnë funksionin e tyre kushtetues në interesin më të mirë të Republikës së Kosovës dhe në pajtim me Kushtetutën dhe Rregulloren e Kuvendit.