Kosova kufizon fillerat dhe ndërhyrjet estetike

Kosova ka ndërmarrë një hap të rëndësishëm në rregullimin e industrisë estetike, duke miratuar masa ligjore që kufizojnë kryerjen e procedurave si mbjellja e flokëve, botoxi dhe fillerat vetëm për mjekë të licencuar dhe të specializuar.

Sipas Ministrisë së Shëndetësisë, trajtime të tilla mund të kryhen vetëm në institucione të certifikuara dhe nga profesionistë me formim mjekësor në fusha specifike si kirurgjia plastike, dermatologjia, kirurgjia maksilofaciale dhe ORL (vesh, hundë, fyt).

Ky vendim synon të vendosë standarde të qarta profesionale dhe të garantojë sigurinë e pacientëve që i nënshtrohen ndërhyrjeve estetike.

Në të kundërt, Shqipëria vazhdon të përballet me një treg të pakontrolluar. Qendrat estetike janë shtuar ndjeshëm në vitet e fundit, shpesh duke operuar pa licencë dhe jashtë çdo mbikëqyrjeje nga institucionet shëndetësore. Jo rrallë, persona pa arsim mjekësor, por vetëm me ndjekje kursesh të shkurtra kozmetike, ofrojnë injeksione botoxi apo fillera, duke rrezikuar shëndetin dhe pamjen e klientëve.

Sipas mjekëve dermatologë, procedurat estetike të kryera nga persona të paautorizuar mund të çojnë në pasoja të rënda, përfshirë infeksione, dëmtime të indeve dhe deformime të përhershme të fytyrës.

Ndërsa Kosova po vendos bazat e një sistemi të sigurt dhe të rregulluar për këtë industri, Shqipëria mbetet ende pas në aspektin e kontrollit, licencimit dhe mbrojtjes së qytetarëve nga praktikat e rrezikshme estetike që po përhapen me shpejtësi.