Detaje shtesë, personi në Podujevë u gjet pa shenja jete në këtë fshat

Sipas të dhënave që ka siguruar Sinjali, ekipi i Emergjencës ka raportuar se në vendin e ngjarjes është konstatuar vdekja e një personi. Viktima është identifikuar si 64 vjeçar, nga fshati Llugë, i cili, sipas dëshmisë së vëllait të tij, kishte pasur probleme shëndetësore dhe përdorte karrocë invalidore.

Nga informacionet e para, mësohet se viktima ishte duke shëtitur me karrocë kur i është përkeqësuar gjendja shëndetësore. Ekipi mjekësor që arriti në vendngjarje konstatoi se ai kishte ndërruar jetë, ndërsa nga ekzaminimi paraprak nuk u vërejtën shenja dhune apo aksidenti.

Karroca me të cilën lëvizte viktima nuk ka pasur dëmtime, çka përjashton mundësinë që ai të jetë goditur nga ndonjë automjet.

Nga prokuroria është urdhëruar që rasti të trajtohet si “Hetim mbi Vdekje – Trup i Pajetë”, ndërsa trupi i viktimës është dërguar për ekzaminim të mëtutjeshëm, mëson Gazeta Sinjali.