Autobusi me pasagjerë përplaset në një shkollë – shumë të lënduar, në këtë shtet

Në Szolnok të Hungarisë, një autobus u përplas me murin e një shkolle, duke shkaktuar shembjen e murit dhe shkatërrimin e plotë të pjesës së përparme të autobusit.

Si pasojë, shumë pasagjerë u lënduan, disa në gjendje kritike, raporton media lokale.

Për fat të mirë, aksidenti nuk shkaktoi dëmtime brenda klasave, pasi nuk kishte mësim në kohën e përplasjes.

Një turmë e madhe prindërish, nxënësish, mësuesish dhe banorësh vendas u mblodhën në vendngjarje. Policia shpërndau pjesërisht turmën për të lehtësuar operacionet e shpëtimit.

Sipas raportit të szoljon.hu, aksidenti shkaktoi të paktën 30 lëndime të lehta dhe katër të rënda. Ekipet e reagimit, përfshirë dy shërbime ambulancash me helikopter, transportuan të lënduarit në spitalet aty pranë.

Agjencia Hungareze e Lajmeve raporton se departamenti i policisë së Szolnokut ka nisur një hetim për të zbuluar shkakun e aksidentit.