Zarfet me para grabiten nga posta private nga persona të armatosur
Një 44-vjeçar ka raportuar sot në mëngjes se është ndaluar dhe sulmuar nga persona të panjohur në dalje të autostradës, në fshatin Duhël të Suharekës.
Viktima, i cili drejtonte një automjet të tipit “kombi” postë private, është ndaluar nga disa persona të dyshuar, të cilët nën kërcënim dhe me forcë i kanë marrë disa zarfe të mbyllura që dyshohet se përmbanin para.
Zëdhënësi i policisë për rajonin e Prizrenit, Shaqir Bytyqi, tha për Gazeta Sinjali:
“Policia ka reaguar menjëherë dhe ka nisur një hetim intensiv për zbardhjen e rastit. Dyshohet se grabitësit ishin disa persona të armatosur, të cilët pas grabitjes janë larguar me një automjet të tipit ‘Golf’.”
Ai shtoi se fatmirësisht, viktima nuk ka pësuar lëndime fizike dhe se nuk dihet saktësisht shumën e parave të grabitura, pasi zarfet kanë qenë të mbyllura. Hetimet po vazhdojnë me qëllim të identifikimit dhe arrestimit të autorëve të kësaj grabitjeje të armatosur.
