Thikë në oborrin e Gjimnazit “Aleksandër Xhuvani” në Podujevë

Një incident shqetësues është regjistruar të enjten në Podujevë, ku në oborrin e një shkolle të mesme është gjetur një mjet i mprehtë – thikë, që dyshohet se i përkiste një nxënësi të mitur.

Sipas burimeve të Gazetës Sinjali, rasti ka ndodhur rreth orës 13:20 në Rrugën “Xhemajl Mustafa”, përkatësisht në oborrin e shkollës së mesme “Aleksandër Xhuvani”, ku disa dëshmitarë kanë raportuar për praninë e thikës në tokë.

Nxënësi i dyshuar është shoqëruar në stacionin policor, ku është intervistuar në prani të avokatit mbrojtës dhe zyrtarit të Qendrës për Punë Sociale, mirëpo ai ka mohuar se mjeti i mprehtë i përkiste atij.

Thika është sekuestruar si provë materiale, ndërsa me konsultim të prokurorit kujdestar për të mitur, rasti është iniciuar si “Mbajtje në pronësi, kontroll ose posedim të paautorizuar të armës”.

I dyshuari është liruar në procedurë të rregullt, ndërsa hetimet po vazhdojnë për të zbardhur plotësisht rrethanat e rastit.