LAJMI I FUNDIT: 34 vjeçarja vdes pasi bie nga kati i gjashtë

Një ngjarje tragjike ka tronditur mbrëmjen e djeshme qytetin e Gjakovës, ku një grua ka humbur jetën pasi ka rënë nga ballkoni i banesës së saj.

Sipas informacioneve të siguruara nga Prokuroria Themelore në Gjakovë, rasti ka ndodhur rreth orës 22:20 në rrugën “Ali Pashë Tepelena”, kur një qytetar kishte raportuar se kishte parë një person duke rënë nga ballkoni i katit të gjashtë në terasën e katit të parë.

Në vendin e ngjarjes kanë dalë menjëherë njësitë policore, ekipi mjekësor dhe hetuesit rajonalë, të cilët kanë konstatuar se viktima ishte një grua rreth 34-vjeçare. Ajo është dërguar me urgjencë në spital, por fatkeqësisht nuk ka arritur të mbijetojë.

Me urdhër të Prokurorit të Krimeve të Rënda, rasti është iniciuar si “Hetim i vdekjes”, ndërsa trupi i pajetë është dërguar në Institutin e Mjekësisë Ligjore në Prishtinë për obduksion.

Hetimet janë në zhvillim me qëllim të zbardhjes së rrethanave të plota të ngjarjes dhe përcaktimit nëse bëhet fjalë për aksident, vetëvrasje apo ndonjë veprim të dyshimtë.