Kreu disa vjedhje, por i ra letërnjoftimi në tokë – Arrestohet 18 vjeçari

Siguria publike në Kosovë po vazhdon të cenohet nga krime të natyrave të ndryshme, veçanërisht nga rastet e vjedhjeve që po ndodhin pothuajse çdo ditë. Shtëpitë, bizneset dhe hapësirat publike janë shpesh cak i personave të dyshuar që veprojnë vetëm apo në grup, duke arritur të kryejnë vjedhje me metoda të ndryshme, raporton Gazeta Sinjali.

Një rast i tillë është zbuluar së fundmi në Prishtinë, ku Policia ka arrestuar një 18-vjeçar nën dyshimin se ka kryer tri vjedhje në markete të ndryshme të kryeqytetit brenda një muaji.

Sipas informacioneve të siguruara nga Sinjali, i dyshuari dyshohet se ka kryer vjedhje në disa pika të marketeve “Viva Fresh Store” në Hajvali dhe në rrugën “Ferid Curri”, si dhe në “Super Viva” në qendrën tregtare Grand Store – Veternik.

Hetimet kanë treguar se rasti i parë është raportuar më 3 tetor 2025, ku një punëtore kishte njoftuar Policinë se një person kishte marrë produkte ushqimore në vlerë rreth 125 euro dhe ishte larguar pa paguar. Nga pamjet e kamerave të sigurisë, policia kishte arritur ta identifikonte fytyrën e të dyshuarit.

Ngjarja e dytë ndodhi më 18 tetor, ku një tjetër market raportoi vjedhje të ngjashme në vlerë prej rreth 45 euro, ndërsa përmes video-incizimeve u konstatua se autori ishte i njëjti person.

Rasti i tretë ndodhi më 22 tetor në “Super Viva”, ku gjatë përpjekjes për t’u larguar, i dyshuari kishte humbur çantën personale. Brenda saj, policia gjeti dokumente që ndihmuan në identifikimin e tij.

Pas veprimeve operative, më 28 tetor 2025, i dyshuari u shoqërua në Stacionin Policor Jugu dhe u intervistua në prani të avokatit mbrojtës, ku edhe pranoi kryerjen e veprave.

Me urdhër të Prokurorit kujdestar, ndaj tij është lëshuar aktvendim për ndalim dhe është dërguar në Qendrën e Mbajtjes në Prishtinë.

Rasti është cilësuar si “Vjedhje”, ndërsa hetimet po vazhdojnë për të zbuluar nëse i riu mund të jetë i përfshirë edhe në raste të tjera të ngjashme.