Ky është drejtori që u arrestua pasi kërcënoi mësimdhënësen
Një rast i rëndë që lidhet me procesin zgjedhor është zbuluar në komunën e Vitisë.
Burime të besueshme nga strukturat e afërta me hetimin kanë bërë të ditur se Njësia për Hetimin e Krimeve Ekonomike dhe Korrupsionit në Gjilan (NJHP) ka arrestuar mëngjesin e së premtes, më 31 tetor 2025 rreth orës 09:30, të dyshuarinDejan Kojiç, rreth 38-vjeçar, drejtor i Shkollës Fillore “Mlladen Markoviq” në Viti.
Sipas hetimeve, Kojiç dyshohet se për një periudhë prej më shumë se dy muajsh ka ushtruar presion psikologjik dhe kërcënime të vazhdueshme ndaj mësimdhënëses D.B., rreth 36-vjeçare, e punësuar në paralelen e kësaj shkolle në fshatin Binçë – Viti.
Ai dyshohet se e ka kërcënuar viktimën se nëse nuk voton në balotazh më 9 nëntor 2025 për kandidatin e Listës Serbe, asaj do t’i ndërpritej marrëdhënia e punës dhe do të përballej me “pasoja socio-ekonomike”.
I dyshuari është arrestuar dhe shoqëruar në zyrat e NJHP-së në Gjilan, ku është tentuar të intervistohet në cilësinë e të dyshuarit, por pas konsultimit me avokatin e tij ka vendosur të mbrohet në heshtje.
Pas veprimeve hetimore, përfshirë intervistimin e ankueses dhe dëshmitarëve, si dhe sigurimin e provave materiale, Prokurori i Shtetit ka lëshuar vendim për ndalim 48-orësh ndaj Kojiçit dhe ka urdhëruar ngritjen e kallëzimit penal për veprën “Cenim i përcaktimit të lirë të votuesve”, sipas nenit 210 të Kodit Penal të Republikës së Kosovës.
Hetimet për rastin janë në vazhdim.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
