Vjedhje e rëndë në Xhaminë e Madhe

Siguria publike në Kosovë konsiderohet se po cenohet nga krime të natyrave të ndryshme, e sidomos nga vjedhjet. Shtëpitë, bizneset e ndryshme në Kosovë dhe hapësirat tjera publike janë shumë shpesh cak i hajnave, të cilët herë vetëm e herë në grup arrijnë të kryejnë vjedhje, raporton Gazeta Sinjali.

Një rast i tillë është regjistruar paraditen e sotme në Xhaminë e Madhe të qytetit të Ferizajt, në rrugën “Dëshmorët e Kombit”.

Burime të besueshme nga strukturat e afërta me hetimin konfirmojnë se ngjarja ka ndodhur më 31 tetor 2025, rreth orës 10:00, kur persona ende të panjohur kanë depërtuar brenda objektit fetar dhe kanë vjedhur pajisje me vlerë të konsiderueshme.

Sipas informacioneve, nga zyra e xhamisë janë marrë një zmadhues zëri i markës “JBL” me vlerë rreth 600 euro, rreth 15 palë këpucë me vlerë totale prej 1,000 euro, si dhe dokumente të arkivuara dhe sistemi i pompave termike, vlera e të cilit nuk është përcaktuar ende.

Hetuesit e Njësisë së Hetimeve të Ferizajt kanë dalë në vendin e ngjarjes dhe kanë kryer ekzaminimin, ku është konstatuar se autorët kanë hyrë në zyrë përmes një dere të dëmtuar, pasi një pjesë e xhamisë është në proces rinovimi.

Pas konsultimit me prokurorin e shtetit, rasti është iniciuar me cilësimin “Vjedhje e rëndë”, ndërsa hetimet janë në vazhdim për identifikimin dhe arrestimin e autorëve të dyshuar.