PZAP po shqyrton ankesën e PDK-së për parregullsi në Mitrovicë

Paneli Zgjedhor për Ankesa dhe Parashtresa (PZAP) ka bërë të ditur të premten se po shqyrton ankesën e Partisë Demokratike të Kosovës (PDK) lidhur me parregullsitë gjatë procesit të numërimit të fletëvotimeve në Komunën e Mitrovicës së Jugut.

PZAP ka theksuar se vendimi për këtë ankesë do të merret brenda afatit të paraparë ligjor.

“Lidhur me pyetjen tuaj, ju njoftojmë se PZAP-i ka pranuar ankesën me nr. ZL.Anr.439/2025, që ka të bëjë me pretendime për parregullsi gjatë procesit të numërimit të fletëvotimeve në Komunën e Mitrovicës së Jugut. PZAP-i, është në proces të shqyrtimit dhe brenda afatit të paraparë ligjor për të njëjtën do të vendos”, ka njoftuar PZAP për rtv21.

Ndërkohë, sa i përket pyetjes nëse janë paraqitur ankesa të ngjashme nga parti të tjera apo në komuna të tjera, PZAP konfirmoi se nuk ka pranuar ankesa të tjera të këtij lloji.

Në Qendrën e Numërimit në Mitrovicë janë hasur keqpërdorime të ndryshme, përfshirë fletëvotime pa vulë, fletëvotime me mos përputhje të numrave serik dhe fletëvotime pa numra serik.

PDK-ja, të martën, dorëzoi një ankesë zyrtare në PZAP, duke argumentuar nevojën për të mbrojtur integritetin e procesit zgjedhor dhe votën e lirë të qytetarëve të Mitrovicës.

Në një komunikatë për media, PDK theksoi se do të ndjekë me përgjegjësi të gjitha procedurat ligjore për të garantuar që rezultati përfundimtar të reflektojë vullnetin real të qytetarëve. Partia gjithashtu ka kërkuar rivotim, duke argumentuar se kjo është mënyra e vetme për të siguruar drejtësi në procesin zgjedhor.

“Vota është e shenjtë. Demokracia fillon e mbaron me ruajtjen dhe respektimin e saj”, thuhet në njoftim, duke theksuar rëndësinë e respektimit të vullnetit qytetar.

Çfarë ndodhi?

Prokuroria Themelore në Mitrovicë e ka urdhëruar të martën Komisionin Komunal Zgjedhor të rifillojë numërimin e votave të balotazhit të 9 nëntorit në Qendrën Komunale në Mitrovicën e Jugut, i cili u ndërpre pas raportimeve për parregullsi.

Prokuroria tha se vendimi u mor pasi kompania sllovene CETIS pranoi përgjegjësinë për një gabim në printimin e fletëvotimeve.

Kompania “ka shpjeguar se problemi i numërimit ndodhi ekskluzivisht në njërën nga katër kokat/pllakat e printerëve me ngjyrë, përgjegjëse për printimin e numrit të qendrës së votimit, dhe se marrin përgjegjësi për këtë gabim, sipas të cilës në rrethana normale do të ishte pothuajse i pamundur të ndodhte”, tha Prokuroria.

Fillimisht, Prokuroria kishte urdhëruar ndalimin e numërimit të votave të garës së balotazhit për Mitrovicën e Jugut, pas parregullsive të raportuara, ndërsa KQZ-ja më pas sqaroi se bëhej fjalë për një gabim teknik nga kompania sllovene që ka shtypur fletëvotimet.