Satira me pushtetin, Logjikonomia hiqet nga YouTube

Kanali në platformën Youtube i televizionit Tëvë1 është mbyllur të hënën.

Shkaqet janë ende të paqarta, por fshirja e tij nga platforma Youtube vjen një ditë pas transmetimit të emisionit satirik ‘Logjikonomia’ ku protagonistët e tij satirizuan me mbështetës të pushtetit aktual të Lëvizjes Vetëvendosje.

“Surla, tupana e goma rezervë”, titullohej emisioni i fundit, numër 101, i emisionit që zakonisht trajton tema politike e shoqërore.

Në këtë emision të fundit, emisioni satirizoi me fenomenin shoqëror të militantëve të partisë në pushtet, Lëvizjes Vetëvendosje, lidhur me betejën elektorale për Mitrovicën e Jugut.

Dy nga protagonistët u shfaqën në emision me goma të automjeteve, një simbolikë për gomat me të cilat militantët e Vetëvendosjes festuan triumfin e Faton Pecit në Mitrovicë natën e 9 nëntorit.