Shkarkohet u.d. i Kryeprokurorit të Shtetit

Këshilli Prokurorial i Kosovës e ka shkarkuar nga detyra ushtruesin e detyrës së Kryeprokurorit të Shtetit, Besim Kelmendi.

Shkarkimi i Kelmendit u votua nga pesë anëtarë të KPK-së, në një mbledhje të mbajtur sot.

“Me pesë vota për shkarkohet nga pozita ushtruesi i detyrës së Kryeprokurorit të Shtetit”, tha pas zhvillimit të votimit, kryesuesi i KPK-së, Ardian Hajdari.

Me të nisur mbledhja e sotme, anëtarja e Këshillit Prokurorial, Jehona Grantolli kërkoi përfshirjen në rend të ditës të një pike për shkarkimin e Besim Kelmendit.

Zëvendëskryesuesja e KPK-së, Grantolli tha se kërkon shkarkimin e ushtruesit të detyrës së Kryeprokurorit pas zhvillimeve të fundit në të cilat është përfshirë Kelmendi.

“Duke pasur parasysh zhvillimet e fundit lidhur me pozitën e ushtruesit të detyrës të Kryeprokurorit të Shtetit, Z. Besim Kelmendi, i cili është pozicionuar tani së fundi me një grup të Këshillit Prokurorial dhe i cili nuk përfaqëson unitetin e KPK-së, si dhe duke parë kërkesat – të cilat janë publike tashmë – që Këshilli Prokurorial të shkarkojë u.d. Kryeprokurorin, kërkoj që kjo pikë të përfshihet në agjendën e takimit të sotëm”, tha anëtarja e KPK-së, Jehona Grantolli.

Grantolli tha se Kelmendi është bërë pjesë e një grupi të ngushtë interesi, i cili është grup brenda KPK-së.

“Unanimisht, ne si këshill e kemi votuar z. Kelmendi në KPK si kandidati me i mirë për pozitën dhe të vetëdijshem se ishim ne situatë të vështirë, është menduar pastaj se është prokurori Besim Kelmendi. I kemi ndjekur zhvillimet e fundit. Është krijuar shumë paqartësi që nuk na shërbejnë neve si KPK”, tha ajo.

Ai e mohoi këtë, duke thënë se nëse del një fotografi e tij në Reçak para vitit 2001 jep dorëheqje dhe largohet nga Kosova.

“Kurrë, absolutisht kurrë, kurrë, kurrë në jetën time s’kam qenë në Reçak deri në vitin 2001. Mund të shihni figura çfarë të doni, me çfarëdo ekspertize, me çfarëdo eksperti vendor e ndërkombëtar, nëse del fotografia ime dhe nëse dal unë aty si pjesëmarrës jo vetëm që jap dorëheqje sot, por e lëshoj Kosovën, do të iki dhe do të zhdukem nga kjo botë sepse nuk bëj gjëra të tilla”.

“S’do ta kisha problem nëse kisha qenë, sot kisha thënë por diçka që s’ekziston nuk është korrekte të thuhet”, shtoi ai.