SPAK konfirmon pezullimin e Ballukut nga detyra

Prokuroria e Posaçme për Korrupsionin dhe Krimin e Organizuar ka dalë me njoftim për Ministren e Infrastrukturës, Belinda Ballukun dhe hetimit ndaj saj.

SPAK ka njoftuar se Ballukut i ka pezulluar ushtrimin e detyrës si zëvendëskryeministre e Shqipërisë dhe Ministre e Infrastrukturës dhe Energjisë si dhe ndalimimin e daljes jashtë vendit.

Ajo akuzohet për kryerjen në bashkëpunim të veprës penale, “Shkelja e barazisë së pjesëmarrësve në tendera apo ankande publike”, në rastin e ndërtimit të tunelit të Llogarasë dhe ngarkohet me po të njëjtën vepër penale për ndërtimin e unazës së jashtme në Tiranë.

Në një njoftim për media thotë se “janë evidentuar shkelje të barazisë së pjesëmarrësve në tendera dhe ankande publike, në kuadër të dy procedurave të rëndësishme prokurimi”.

“Në cilësinë e Ministrit të Infrastrukturës dhe Energjisë ka ndjekur dhe orientuar në vijimësi procedurën e këtij prokurimi publik, prej fazës përgatitore, zhvillimit të procedurës, dorëzimit dhe vlerësimit të ofertave, deri në momentin e lidhjes së kontratës me operatorin ekonomik fitues”, thotë SPAK derisa sqaron veprimet joligjore të Ballukut.

SPAK shton se Balluku, në bashkëpunim me anëtarët e Komisionit të Vlerësimit të Ofertave, Evis Berberi, Gentian Gjyli, Erald Elezi, Jetmira Dervishi dhe Mirzeta Kashnica, “kanë paracaktuar fituesin e kësaj procedure prokurimi, kanë krijuar avantazhe dhe privilegje të padrejta për bashkimin e operatorëve ekonomikë fitues “I….dhe A…..””.

Ndërkohë, sa i përket ndërtimit të unazës së jashtme në Tiranë, SPAK thotë se “Balluku, në cilësinë e Ministrit të Infrastrukturës dhe Energjisë, ka ndjekur dhe orientuar në vijimësi procedurën e këtij prokurimi publik të zhvilluar nga Institucioni në varësi të kësaj Ministrie, Autoriteti Rrugor Shqiptar, në fazën përgatitore, zhvillimit të procedurës, dorëzimit dhe vlerësimit të ofertave”.

“E pandehura Belinda Balluku në bashkëpunim me të pandehurin Evis Berberi, anëtarët e Njësisë së Prokurimit, shtetasit J.Ç, A.K., D.Xh, anëtarët e Komisionit të Vlerësimit të Ofertave, Erald Elezi dhe shtetasit K.K, M.Sh., kanë paracaktuar fituesin e kësaj procedure prokurimi, krijuar avantazhe dhe privilegje të padrejta për bashkimin e operatorëve ekonomikë,“E…” sh.p.k, “P…”sh.p.k, dhe “N…”sh.p.k”, thuhet në njoftimin e SPAK.

Për zyrtarët e tjerë si masë e sigurisë është caktuar arresti shtëpiak.