Ndërron jetë babai i analistit të Debat Plus

Ka ndërruar jetë babai i Ylli Hoxhës, Naim Hoxha.

Lajmi është publikuar nga Albin Kurti.

Më poshtë postimi i Kurtit:

Sot nderojmë jetën dhe punën e Naim Hoxhës, një inxhinier i shquar i elektroteknikës, një ligjërues që edukoi e mësoi breza, dhe një aktivist politik për të drejtat dhe zhvillimin e Kosovës.

Ai ishte pjesë e grupit të shkëlqyer të profesionistëve të formuar në Universitetin e Prishtinës dhe Universitetin e Zagrebit, që pas luftës qëndruan kundër privatizimit të aseteve të industrisë së Kosovës, mbështetën rolin e shtetit si aktor në ekonomi, që luftuan për pavarësinë dhe sigurinë energjetike të Kosovës si dhe komplementaritetin me Shqipërinë, duke afirmuar argumente të forta e të qarta dhe duke bërë beteja me guxim të madh në këtë drejtim.

Në KEK, në termocentralin “Kosova B”, në periudhën 1980–1984 ai udhëhoqi sistemin e teknologjisë informative dhe monitorimin e proceseve teknologjike me DATALOGER, duke sjellë standarde ndërkombëtare në energjetikën e vendit.

Specializimet në CGEE Alstom, Paris (1981) dhe vizitat në Brookhaven National Laboratory, ShBA (1982–1984) pasqyrojnë përkushtimin e tij të palodhur për dije dhe përmirësim të vazhdueshëm.

Si ligjërues i dashur, ai ishte një dritë udhërrëfyese për studentët. Në vitin 1976 filloi si Asistent në Fakultetin Teknik, dega e Elektroteknikës. Në vitin 1993 ishte Ligjërues i lëndës “Bazat dhe Struktura e të Dhënave” (kurse unë isha student i tij). Në 1994 ishte Ligjërues në Fakultetin Ekonomik për “Programim dhe Gjuhë Programore” dhe “Bazat e të Dhënave dhe Softuer Aplikativ”. Në vitin 2004 ishte ligjërues për Menaxhimin e Projekteve Informatike (PMP), ndërsa prej 2007 deri në fund dha mësim në “Riinvest”.

Naim Hoxha ishte një dishepull i socialdemokracisë. Ai besonte se politika nuk është thjesht pushtet e karrierë, por përgjegjësi ndaj shoqërisë. Një socialdemokrat patriot që nuk ndante diturinë vetëm për të dhënë mësim, por për të ndërtuar institucione dhe kolektivitete të fuqishme. Ai luftoi çdo ditë për publiken dhe lirinë.

Naim Hoxha la pas një trashëgimi që shkon përtej kohës, në dijen profesionale, në politikën e ndershme, në formimin e mendjeve të reja. Në Lëvizje humbëm një nga mentorët më të zotë i cili pati drejtuar Komitetin tonë Profesional për Energjetikë nga viti 2014 deri në vitin 2019. Kosova humbi një profesionist e një profesor, dhe një shembull qytetarie e kontributi për të gjithë ne.

Ngushëllime familjes e miqve, kolegëve e studentëve të tij, aktivistëve e anëtarëve tanë.