Ky është ministri që dyshohet se doli nga vetura dhe kanosi qytetarët

Ministri në detyrë i Administrimit të Pushtetit Lokal, Elbert Krasniqi, është bërë subjekt i një hetimi penal. Prokuroria Themelore në Pejë ka konfirmuar se ka autorizuar nisjen e procedurave ndaj tij nën dyshimin për veprën penale të kanosjes.

Zëdhënësi i Prokurorisë, Shkodran Nikçi, ka bërë të ditur se incidenti dyshohet të ketë ndodhur më 23 nëntor në Pejë dhe përfshin dy qytetarë si palë të dëmtuara.

Sipas hetimeve fillestare, konflikti ka nisur për shkak të një bllokimi në komunikacion. Ministri Krasniqi dyshohet se ka dalë nga automjeti i tij dhe i ka kërcënuar personat në fjalë.

“Me urdhër të prokurorit është inicuar rast për veprën penale të kanosjes. I dyshuari është një ministër në detyrë i Republikës së Kosovës. Për këtë çështje jemi duke ndërmarrë të gjitha veprimet e nevojshme hetimore në koordinim të plotë me Policinë e Kosovës. Dyshohet se gjithçka ka ndodhur në një rrugë, derisa ka qenë e bllokuar për shkak të trafikut, dhe sipas tyre i njëjti ka dalë nga vetura dhe i ka kanosur”, ka deklaruar Nikçi.