Ky është personi që dyshohet se plagosi një vajzë

Një incident i rëndë është shënuar mbrëmjen e 27 nëntorit 2025 në Vushtrri, ku një person dyshohet se ka shtënë me armë zjarri në drejtim të një familjeje, duke plagosur një të mitur.

Ngjarja ka ndodhur rreth orës 20:15 në rrugën “Ferat Novolani”. Sipas informatave, ankuesi M.V. është paraqitur në Stacionin Policor të Vushtrrisë dhe ka raportuar se i dyshuari Shaban Beqiri ka shtënë dy herë me armë të gjatë në drejtim të tij dhe familjes së tij, me ç’rast është plagosur në krahun e djathtë vajza e vëllait të tij, e mitura E.M.

E mitura është dërguar për tretman mjekësor në QKUK dhe, sipas mjekëve, ndodhet jashtë rrezikut për jetë, nën sigurimin e njësisë policore.

Njësitë policore kanë dalë në vendin e ngjarjes dhe kanë lokalizuar shtëpinë e të dyshuarit, ku kanë arritur të konfiskojnë një armë të gjatë që dyshohet se është përdorur në rast, 14 fishekë si dhe dy gëzhoja. I dyshuari nuk është hasur në vendngjarje, pasi është larguar në drejtim të panjohur.

Nga të shtënat me armë janë shkaktuar dëme materiale edhe në një veturë BMW me ngjyrë të zezë, pronë e ankuesit I.B., e cila ishte e parkuar përballë shtëpisë së të dyshuarit, si dhe në një banesë përballë, ku janë dëmtuar roleta dhe dritarja, pronë e Lirdon Shalës. Në momentin e incidentit nuk ka pasur persona në banesë.

Në vendin e ngjarjes kanë dalë edhe Njësia e Hetimeve Rajonale dhe krim-teknika, të cilët kanë kryer këqyrjen e vendit dhe kanë mbledhur provat e nevojshme për zbardhjen e rastit.

Rasti është cilësuar si “Vrasje e rëndë në tentativë”, ndërsa hetimet dhe kërkimet për arrestimin e të dyshuarit janë duke vazhduar.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.