35 vjeçari gjendet i vdekur në banesë në Prishtinë

Një ngjarje e rëndë ka ndodhur mbrëmjen e 11 dhjetorit 2025 në Prishtinë, në kompleksin e njohur si “Banesat e Butrinit”, ku një person është gjetur pa shenja jete në banesën e tij.

Rreth orës 18:00 është raportuar se një person dyshohet se ka kryer vetëvrasje. Njësitë policore kanë dalë menjëherë në vendngjarje, ku kanë takuar disa dëshmitarë që kishin informacion rreth rastit.

Njëri prej dëshmitarëve ka deklaruar se rreth orës 01:15 kishte dëgjuar një zhurmë nga banesa e viktimës. Më vonë, një tjetër dëshmitar ka vërejtur trupin e personit të shtrirë në dysheme përmes dritares së banesës dhe ka njoftuar Policinë.

Policia ka tentuar të hapë derën, por e njëjta ka qenë e mbyllur. Me ndihmën e zjarrfikësve, dera është hapur dhe brenda është gjetur viktima i shtrirë në dysheme.

Në vendngjarje kanë dalë edhe ekipet mjekësore, të cilat kanë konstatuar se personi ishte pa shenja jete. Po ashtu, të pranishme kanë qenë njësitë rajonale të hetimeve, njësia K-9, Prokurori i Shtetit dhe ekipi i Institutit të Mjekësisë Ligjore, të cilët kanë tërhequr trupin për ekzaminim të mëtejshëm.

Me urdhër të Prokurorit të Shtetit, rasti është iniciuar si “Hetim mbi vdekjen” dhe hetimet për rrethanat e ngjarjes janë duke vazhduar.