Shpërthen bombola e gazit në familjen shqiptare

Një bombol gazi ka shpërthyer mbrëmjen e sotme në lagjen “6 Maji” në Elbasan, duke shkatërruar plotësisht një banesë private.

Sipas informacioneve paraprake, fatmirësisht nuk raportohet për persona të lënduar.

Në momentin e ngjarjes, zonja e shtëpisë kishte dalë për të kërkuar ndihmë, pasi bombola ishte përfshirë nga flakët.

Po ashtu, për mrekulli kanë shpëtuar edhe efektivët e zjarrfikëses, të cilët sapo kishin mbërritur në vendngjarje në momentin kur ndodhi shpërthimi. Si pasojë e shpërthimit të fuqishëm, banesa është kthyer e pabanueshme.

Zjarrfikësit kanë përsëritur apelin e tyre për rrezikun që paraqesin bombolat e gazit 5-litërshe, të cilat janë të papërshtatshme për përdorim në ambiente të brendshme, duke kërkuar që ato të hiqen nga qarkullimi.