Ky është personi që u kap me drogë dhe arsenal armësh

Një aksion i njësive antidrogë ka rezultuar me arrestimin e një personi të dyshuar për blerje, posedim, shpërndarje dhe shitje të paautorizuar të narkotikëve, si dhe për posedim, kontroll ose mbajtje të paautorizuar të armëve, mbrëmjen e 16 dhjetorit 2025 në fshatin Skivjan të Gjakovës.

Gazeta Sinjali mëson se rreth orës 22:00, hetuesit e DHTN-së në Gjakovë kanë ndaluar për kontroll një veturë të tipit Mercedes Benz, të drejtuar nga Ardi Fetahaj.

Gjatë ndaljes, i dyshuari dyshohet se ka hedhur nga dritarja e veturës një objekt të dyshimtë. I njëjti, i njohur për njësinë antidrogë, është arrestuar në vend, ndërsa për rastin është njoftuar Prokurori i Shtetit.

Me urdhër të Prokurorit, policia ka zbatuar bastisje në shtëpinë e të dyshuarit, ku gjatë kontrollit janë gjetur dhe sekuestruar në cilësinë e provave materiale: 14.15 gramë substancë e dyshuar narkotike e llojit marihuanë, një armë zjarri, pistoletë kalibri 6 mm (Zastava, modeli 635) me një karikator dhe 6 fishekë,31 fishekë 9 mm, 90 fishekë kalibri 7.62 mm, 48 fishekë GFL 9 mm, 109 fishekë kalibri 7.62 mm,19 fishekë kalibri .357 Magnum, një karikator AK-47, i mbushur me 18 fishekë kalibri 7.62 mm

Burime të besueshme nga strukturat e afërta me hetimin bëjnë të ditur për Sinjalin se Prokurori Kujdestar për Krime të Rënda nga PTH-Gjakovë ka caktuar ndaj të dyshuarit masën e ndalimit policor prej 48 orësh, ndërsa janë iniciuar procedurat penale për veprat e lartcekura.

Hetimet për këtë rast janë në vazhdim.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.