Ekskluzive: Ky është i dyshuari që i sulmoi zyrtarët policorë

Një incident serioz është shënuar pasditen e 16 dhjetorit 2025 në Gllogoc, ku gjatë ndërhyrjes policore për një rast të dhunës në familje, një person dyshohet se ka sulmuar fizikisht zyrtarët policorë.

Gazeta Sinjali mëson se rreth orës 16:00, patrulla policore ka dalë në fshatin Abri e Epërme pas raportimit për dhunë në familje.

Në vendngjarje, zyrtarët policorë kanë hasur të dyshuarin Shkelqim Hajdaraj, i cili ndodhej në shtëpinë e tij duke demoluar ambientin dhe thyer dritaret me një mjet pune.

Sipas informatave, i dyshuari ka dalë në korridor me mjetin në dorë dhe nuk iu është bindur urdhrave të zyrtarëve policorë, duke vazhduar t’u afrohet atyre në mënyrë kërcënuese. Zyrtarët kanë arritur t’ia largojnë mjetin nga dora, por pavarësisht kësaj, ai ka vazhduar të mos i përfillë urdhrat verbalë.

Në këtë moment, i dyshuari dyshohet se ka goditur me grusht në fytyrë një zyrtar policor, duke i shkaktuar lëndime trupore, si dhe ka shtyrë dhe mbështetur një zyrtare policore për muri. Si pasojë, dy zyrtarë policorë, emra të njohur për redaksinë kanë pranuar tretman mjekësor në QKUK në Prishtinë.

Edhe i dyshuari ka marrë trajtim mjekësor dhe më pas është shoqëruar në stacion policor, ku është intervistuar në prani të avokatit mbrojtës. Lidhur me rastin është njoftuar Prokurori Kujdestar, i cili ka udhëzuar që rasti i “Sulmit ndaj personit zyrtar” të trajtohet në procedurë të rregullt.

Ndërkohë, në lidhje me rastin e dhunës në familje, me urdhër të Prokurorit, Shkelqim Hajdaraj është ndaluar për 48 orë, ndërsa hetimet janë duke vazhduar.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.