Tronditet bota e futbollit: Vritet në mes të rrugës lojtari i Barcelona SC
Mbrojtësi i majtë i Barcelonës SC nga Ekuadori, Mario Pineida, është vrarë brutalisht në mes të rrugës në qytetin Guayaquil.
Lajmi është konfirmuar nga policia ekuadoriane, e cila ka bërë të ditur se 33-vjeçari është qëlluar për vdekje përpara një dyqani të mishit. Pineida ishte edhe lojtar i kombëtares së Ekuadorit, për të cilën kishte zhvilluar nëntë paraqitje.
Sipas mediave lokale, dy persona me motoçikletë iu afruan futbollistit dhe njëri prej tyre hapi zjarr në drejtim të tij. Në incident është plagosur edhe një person tjetër, gjendja shëndetësore e të cilit ende nuk dihet.
Klubi Barcelona SC nga Guayaquil ka reaguar përmes rrjeteve sociale, duke shprehur keqardhje të thellë për humbjen e lojtarit të tyre. Reagim ka pasur edhe nga Fluminense, klubi brazilian ku Pineida kishte luajtur në vitin 2022 dhe me të cilin kishte fituar titullin e Kampionatit Carioca.
Autori i vrasjes ndodhet ende në arrati, ndërsa policia ka bërë të ditur se është duke punuar intensivisht për zbardhjen e rastit dhe mbledhjen e të gjitha informacioneve relevante për hetimin.
