Vra’sje në tentativë dhe lëndim i rëndë trupor

Një ngjarje e rëndë penale është regjistruar më 27.12.2025, rreth orës 11:30, në fshatin Duhël të komunës së Suharekës, ku një përleshje fizike ka eskaluar në përdorim të armës së zjarrit.

Sipas informacioneve, pas një konflikti fizik mes disa personave, njësitet policore kanë dalë në vendin e ngjarjes dhe kanë konstatuar plagosje me armë zjarri. Hetimet paraprake tregojnë se përleshja ka paraprirë të shtënat, si pasojë e të cilave një person ka mbetur i plagosur nga arma e zjarrit, ndërsa një tjetër ka pësuar lëndime trupore nga përleshja fizike.

Në vendngjarje kanë intervenuar njësitet e hetimeve të Stacionit Policor Suharekë, të cilët kanë qëndruar deri në arritjen e Sektorit të Hetimeve Rajonale që kanë marrë në dorë veprimet e mëtejme hetimore.

Pas pranimit të njoftimit, një ekip i hetimeve rajonale ka dalë në vendin e ngjarjes, ndërsa një ekip tjetër është angazhuar në Spitalin Rajonal të Prizrenit.

Sipas burimeve nga stafi mjekësor, njëri nga të dyshuarit është dërguar për trajtim të mëtutjeshëm në QKUK – Prishtinë për shkak të lëndimeve në krahun e djathtë, por gjendja e tij shëndetësore nuk është e rrezikshme për jetën.

Me urdhër të Prokurorit kujdestar, pesë persona të dyshuar janë ndaluar për 48 orë, ndërsa rasti po trajtohet si “Vrasje në tentativë” dhe “Lëndim i rëndë trupor”. Hetimet janë në vazhdim për zbardhjen e plotë të rrethanave të ngjarjes.