LAJMI I FUNDIT: Edhe një shpërthim në Mitrovicën e Veriut
Një shpërthim i fundit sapo ka ndodhur në afërsi të ndërtesës ku ndodhet Komisioni Komunal Zgjedhor në Mitrovicën e Veriut.
Mjeti shpërthyes është hedhur në afërsi të objektit ku ka policë dhe gazetarë, por fatmirësisht nuk ka të lënduar.
Për shkak të errësirës, nuk dihet se nga është hedhur ky mjet, por nga shpërthimi i fortë, janë shqetësuar policë dhe gazetarë.
Objekti ku ndodhet Komisioni Komunal Zgjedhor është në lagjen “Suhodoll” në afërsi të tre rrokaqiejve në afërsi të lumit ‘Ibër’ në veri të Mitrovicës.
Ndërkohë, Policia e Kosovës së bashku me atë të EULEX-it, me njësitet për deminim, kanë hyrë brenda në objekt.
Aty ndodhet ende një mjet i pashpërthyer dhe ekipet e deminimit kanë hyrë për ta çaktivizuar këtë mjet që dyshohet të jetë shpërthyes.
Tash për tash situata është relativisht e qetë por mjaft e tensionuar.
Policët e Kosovës e EULEX-i rrethojnë zyrën e KKZ-së në Mitrovicën e Veriut
Pjesëtarë të Policisë së Kosovës dhe atyre të EULEX-it janë vendosur para zyrës së Komisionit Komunal Zgjedhor në Mitrovicën e Veriut.
Gazetari i RTK-së Bashkim Vishaj i cili ndodhet në veri të Mitrovicës, raporton se brenda këtij objekti dyshohet për një mjet të pashpërthyer dhe se po pritet të vijnë njësi te specializuara.
