Skandal: Qytetari sulmon infermieren në Spital

Sot rreth orës 11:00, në Repartin e Ortopedisë të Spitalit të Përgjithshëm “Dr. Sami Haxhibeqiri” në Mitrovicë, ka ndodhur një incident, gjatë të cilit janë sulmuar një infermiere dhe dy punëtorë të sigurimit fizik gjatë kryerjes së detyrave të tyre.

Sipas njoftimit të spitalit, sulmi ka ndodhur në momentin kur stafi po siguronte respektimin e rregullave të hyrjes në repart dhe po pengonte praninë e personave të paautorizuar.

Si pasojë e incidentit, tre punëtorët kanë marrë trajtim emergjent mjekësor.

Spitali i Përgjithshëm “Dr. Sami Haxhibeqiri” ka dënuar ashpër çdo formë të dhunës ndaj stafit shëndetësor dhe punëtorëve të sigurimit fizik, duke kërkuar nga organet kompetente që rasti të trajtohet sa më shpejt dhe në përputhje me ligjin.