Deputeti llapjan: Në këtë krizë, tërheqja e Trustit është zgjidhje e drejtë

Shefi i Grupit Parlamentar të Aleancës për Ardhmërinë e Kosovës, Besnik Tahiri, ka kërkuar nga deputetët e Kuvendit që ta mbështesin kërkesën e qytetarëve për tërheqjen e 30% të kursimeve pensionale.

Në mbledhjen e Komisionit për Buxhet, Punë dhe Transfere, Tahiri u shpreh se e vetmja mënyrë për t’ua lehtësuar pak jetesën, është tërheqja e Trustit.

“Dora e shtetit te njerëzit që janë në marrëdhënie pune, po arrin më vështirë, sesa te qytetarët që janë në skema sociale. Skemat sociale, pak a shumë janë duke u organizuar, siç ishte mbështetja për studentë, pensionistë, ndihma këto, që në një masë të caktuar, ia japin një vlerë të shtuar të hyrave të tyre, që i kanë për jetesë”, ka thënë Tahiri të mërkurën.

“Përderisa punëtorët e sektorit publik dhe privat, që kanë para të kursyera, nuk kanë qasje në dorën e shtetit dhe në përfitime. E vetmja mënyrë për t’ua lehtësuar pak jetesën, është tërheqja e trustit, respektivisht skemës, siç është përcaktuar tek neni 12”, shtoi ai.

Tahiri thekson se e kupton pjesën procedurale, por potencon se janë në mes të një vendimi të thjeshtë se nëse duan t’ua lehtësojnë jetesën kësaj kategorie të njerëzve.

“Ata që janë në punë dhe marrin pagën 300-400 euro, janë rast social. Nuk është një vendim i lehtë, sepse preket skema pensionale, por po ashtu ua lehtësojmë jetesën rreth 250-300 mijë njerëzve”, ka thënë Tahiri.

Gjatë ditës së sotme, është proceduar në Kuvend nisma për tërheqjen e Trustit.