Ai në një prononcim për mediumin ka konfirmuar se tashmë kanë filluar me kohë hetimet rreth këtij rasti.

I pyetur për dyshimet e para, ai tha se për shkak se hetimet janë ende në fazë fillestare, nuk mund të jap më shumë informacione.

“Ne i kemi ndërmarrë të gjitha veprimet hetimore lidhur me rastin. Nuk dijmë ende se çfarë ka ndodhur, nuk mund të themi ende asgjë”, deklaroi shkurt ai.

Ndryshe, në një konferencë për media, Haxhiu tha se ky është një akt i rëndë kriminal dhe se ka njoftuar organet e rendit për këtë rast. Ajo ka thënë se për zhdukjen e tyrje janë njoftuar mbrëmë.

“Ky është një akt i rëndë kriminal, për këtë arsye menjëherë kam njoftuar kryeprokurorin e shtetit Besim Kelmendin dhe drejtorin e PK-së Fehmi Hoti. Sot në mëngjes kam vizituar IML dhe nga zyrtarët kompetentë jam njoftuar si në vijim: Në mbajtëset e epruvetave kanë qenë 15 mostra me gjak, një e urinës dhe një epruvetë e lukthit. Nga këto IML dy epruveta me gjak ia ka dhënë Institutit zciveran dhe një policisë për AND. Pra sipas informacioneve mungojnë 12 epruveta me gjak, një e urinës dhe një e lukthit’, tha ajo.

Sipas saj, vetëm tre persona kanë qasje në këtë zyrë ku ruhen mostrat dhe se qëllimi i këtij veprimi është shtrembërimi i rastit.

“Sipas informacioneve vetëm tre persona i kanë çelësat në vedin ku ruhen mostrat çdo kush që ka ndjekur sado pak rastin mbi vrajen e Astritit e ka të qartë se prej 6 vitesh të gjitha të dhënat, provat dëshmitarët dhe çdo rrethanë është synuar të shtrembërohet, zhduket apo të eliminohet. Njëjtë ka ndodhur edhe më këdo që ka pasur vullnet për ta zbardhur këtë rast kujtojmë rastin e mjekëve ekspertëve që përgatitën raportin e veçantë mbi të gjeturat e raportit të autopsisë siç kishte përgatitur IML”, shtoi ajo.

Tutje, ajo ka njoftuar se i di emrat e personave të cilët kanë qasje në Institutin e Mjekësisë Ligjore (IML) dhe theksoi se do të marrin masa disiplinore ndaj zyrtarëve përgjegjës, përcjell teve1.info

“Më duhet të theksoj se unë i di emrat e personave të cilët kanë qasje në këtë institucion në Departamentin e laboratorit të toksikologjisë, por unë nuk mund t’i them ata, për faktin se tashmë të njëjtit i di edhe Policia edhe Prokuroria. Sa i përket masave, ne na takon që të ndërmarrim masa disiplinore ndaj zyrtarëve përgjegjës”, theksoi ajo.

Ministrja Haxhiu beson se sot do të përfundojë puna me suspendimin e të dyshuarve.

“Unë besoj që sot do të përfundojë puna në suspendimin sepse legjislacioni në fuqi nuk lejon menjëherë shkarkimin, por suspendimin deri në një procedurë përfundimtare. Dhe sigurisht në përputhje me kompetencat e mia do të ndërmarrë edhe unë përgjegjësitë e mia apo do të ndërmarrë masa ndaj atyre të cilët kanë qenë në krye të institucionit, por që sipas njoftimit sot në Institutin e Mjekësisë Ligjore, dukej që as nuk e kanë pasur mendjen te veprimet e përgjegjësitë e tyre”, shtoi Haxhiu.

Tutje, ajo tha se që nga 21 tetori i 2021-ës nuk është bërë ndonjë kontroll i dosjeve sepse kjo mund të bëhet vetëm me kërkesë të Prokurorisë.

“Në pyetjen time se do të thotë sa shpesh i kontrolloni dosjet nëse janë të gjitha në momentin kur dosjet sistemohen vetëm kur ka kërkesa nga Prokuroria mund t’ shohin dhe t’i ndajnë me Prokurorinë mostrat dhe sipas informacioneve që nga tetori i 2021-ës nuk kanë pasur kontrollë nëse janë dosjet, mostrat, sepse kështu e kanë sistemin për këtë pastaj merren institucionet nëse ka qenë e duhur kështu”, tha ajo.

Ministrja thotë se nuk ka ndonjë incizim të kamerave të sigurisë për shkak se nuk qëndrojnë më shumë se një muaj.

“Dje, momentin që kanë bërë këtë bartje të mostrave nga frigoriferët e vjetër dhe të ri e kanë kuptuar se mungojnë mostrat. Nuk dihet kur pyetëm për kamerat e sigurisë por ju e dini vetëm një muaj sipas informacioneve, nuk mund të qëndrojnë më shumë se dy javë apo një muaj”, theksoi ajo.

Haxhiu njoftoi se mbrëmë ka marrë lajmin se janë zhdukur mostrat e Astrit Deharit. Ajo tha se ky është një akt i rëndë kriminal dhe se qëllimi i këtij veprimi është shtrembërimi i rastit.

Astrit Dehari kishte vdekur në burgun e Prizrenit në vitin 2016, ku po mbahej në paraburgim.

Ai bashkë me disa aktivistë të VV-së dyshoheshin për sulm ndaj Kuvendit të Kosovë me armë zjarri, ku më pas ata ishin liruar nga këto akuza.

Familjarë por edhe nga partia e VV-së dyshojnë se Astrit Dehari ishte vrarë. Ndërsa që kjo çështje ishte dërguar edhe në institutin zvicran.

Prokuroria Speciale e Kosovës kishte thënë se në raportin e pranuar nga Instituti i Mjekësisë Ligjore në Lozanë të Zvicrës, më 1 prill të këtij viti për rastin e Astrit Deharit, është thënë se analizat e ADN-së, nga objektet që kanë qenë në kontakt me të ndjerin, nuk kanë treguar profil të ADN-së përveçse të vetë atij.

Disa prej objekteve të analizuara kanë qenë brisku i rrojës, stilolapsi i lidhur me një lidhëse këpucësh dhe një pjesë metali./teve1.info/