Ndërron jetë në moshë të re Driton Aliu

Komuna e Gjilanit ka humbur sot një prej zyrtarëve të saj. Në moshën 44-vjeçare, ka ndërruar jetë Driton Aliu, zyrtar në Kabinetin e kryetarit të Komunës, Alban Hyseni.

Lajmin e ka konfirmuar vetë kryetari Hyseni përmes një njoftimi publik, duke shprehur dhimbjen për humbjen e një bashkëpunëtori të afërt dhe një “miku të zemrës”.

“Me pikëllim të thellë mora lajmin e trishtë për ndarjen nga jeta të Driton Aliut, mikut tim të zemrës që e njoha prej vitesh. Dritoni nuk ishte vetëm pjesëtar i kabinetit tim, ai ishte mik i vërtetë, njeri me zemër të madhe, i përkushtuar dhe gjithmonë pranë atyre që e donin,” tha Hyseni në postimin e tij në Facebook.

Kryetari i Komunës shtoi se: “Ikja e tij e parakohshme lë një boshllëk të madh në jetën e të gjithë neve që e njohëm,” duke u shprehur ngushëllime familjes, miqve dhe të afërmve të Aliut.