Tërhiqen nga tregu disa lloje të qumështit Aptamil
Agjencia e Ushqimit dhe Veterinarisë (AUV) të premten ka njoftuar për tërheqjen nga tregu të disa produkteve të qumështit për foshnje të markës Aptamil, pas dyshimeve për praninë e një substance të rrezikshme.
Sipas AUV, vendimi është marrë pas një njoftimi nga Autoriteti Kombëtar i Ushqimit në Shqipëri, i cili është informuar përmes Sistemit të Paralajmërimit të Shpejtë për Ushqimin dhe Ushqimin për Kafshë (RASFF), lidhur me praninë e substancës Cereulide në formulën ushqimore për fëmijë me origjinë nga Gjermania.
“Autoritetet shqiptare kanë bërë të ditur se subjekti ‘Rossmann & LALA SH.P.K.’ në Shqipëri ka eksportuar produktin APTAMIL 1 PRONUTRA 800 gr. ADVANC, loti 172911, me datë skadimi 10.11.2026, në Republikën e Kosovës për kompaninë Rossmann Kosova”, thuhet në njoftim.
Pas inspektimit të depos së Rossmann Kosova, inspektorët kanë konfirmuar se kompania ka nisur tërheqjen edhe të produktit APTAMIL PRE PROFUTURA DUO ADVA 800 gr., me numër artikulli 405663100.
AUV ka njoftuar se, në bashkëpunim me kompaninë përkatëse, po realizohet grumbullimi dhe bllokimi i produkteve të identifikuara, ndërsa së shpejti do të nisë edhe procesi i asgjësimit, sipas legjislacionit në fuqi.
Agjencia u bën thirrje qytetarëve që posedojnë këto produkte të mos i përdorin dhe t’i kthejnë në pikat e shitjes.
