Një person bie nga kulmi, pëson lëndime të rënda

Një incident serioz ka ndodhur të hënën në fshatin Babush i Muhaxherëve të Lipjan, ku një punëtor ka pësuar lëndime të rënda gjatë kryerjes së punimeve ndërtimore.

Siç mëson Sinjali, rasti është raportuar më 16.02.2026 rreth orës 09:00, kur Policia është njoftuar se një person ishte lënduar në vendin e punës. Njësitë policore kanë dalë menjëherë në vendin e ngjarjes së bashku me ekipin e Emergjencës.

Sipas informacioneve, i lënduari, rreth 27-vjeçar, dyshohet se ka rënë nga kulmi i objektit ku po punonte. Ai është dërguar për trajtim mjekësor në QKUK, ku po vazhdon të marrë ndihmën e nevojshme shëndetësore.

Në vendngjarje kanë dalë edhe njësia e hetimeve si dhe Inspektori i Punës, ndërsa disa persona janë intervistuar në cilësinë e dëshmitarëve. Lidhur me rastin është intervistuar edhe një person në cilësinë e të dyshuarit.

Pas konsultimit me prokurorin kujdestar, rasti është iniciuar për veprën penale “Asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës”, ndërsa ndaj të dyshuarit është caktuar masa e ndalimit për 48 orë.

Hetimet për rastin janë duke vazhduar.