Luis Enrique: Një lojtar më zhgënjeu në Katar

Tashmë ish-trajneri i Spanjës, Luis Enrique, bëri një tjetër paraqitje në një transmetim direkt në rrjetin ‘Twitch’ ku iu përgjigj pyetjeve të ndjekësve për Kupën e Botës në Katar.

Spanjollët zhgënjyen në Katar, duke shënuar vetëm një fitore në fazën e grupeve ndaj Kostarikës, derisa barazuan me Gjermaninë dhe humbën nga Japonia. Në raundin e 1/8-ës, ata nuk arritën të mbijetojnë në serinë e penalltive kundër Marokut.

I pyetur nëse do të udhëtonte sërish me të njëjtët 26 lojtarë në Katar, ai tha se do të bënte një ndryshim.

“Nga 26 lojtarët që mora në Botëror, njërin do ta lija jashtë, do të merrja një tjetër në vend të tij. Këtë mund ta them tani, por nuk do të them se kë do të fshija apo kush do ta zinte vend e tij.

Ka një lojtar që nuk më pëlqeu për shkak të asaj që pashë”, tha Enrique, por pa zbuluar emrin e lojtarit.

Ai foli edhe për surprizën më të madhe të këtij Botërori. “Uau. Maroku. Ata kanë katër futbollistë shumë të mirë”, shtoi ai.

Luis Enrique ka konfirmuar se do të punojë sërish si trajner klubi, por nëse nuk gjen ndonjë klub ndërkohë thotë se do të presë fillimin e sezonit të ri.