Mësohet arsyeja e suspendimit të 6 policëve

Inspektorati Policor i Kosovës (IPK), përmes Departamentit të Hetimeve, në dy raste të ndara ka rekomanduar suspendimin e tetë zyrtarëve policorë në Gjakovë dhe Gjilan.

Rasti i parë ka ndodhur më 19 shkurt 2026 në Gjakovë, ku një qytetar ishte njoftuar për një gjobë për parkim të parregullt.

Rast për të cilin raportoi edhe Gazeta Sinjali.

I njëjti kishte shkuar në stacionin policor për të marrë tiketen për kundërvajtje, por pas një bisede me zyrtarët policorë, ai ishte arrestuar nën dyshimin për kanosje.

Pas pranimit të ankesës, hetuesit e IPK-së kanë ndërmarrë veprime hetimore, duke analizuar shkresat e rastit, raportet e zyrtarëve policorë si dhe një audio-incizim lidhur me ngjarjen.

Sipas IPK-së, është konstatuar se raportet e zyrtarëve policorë, mbi bazën e të cilave ishte iniciuar rasti për kanosje, nuk përputhen me përmbajtjen e incizimit audio dhe dyshohet se ato nuk paraqesin saktë gjendjen faktike.

Hetuesit janë konsultuar me Prokuroria Themelore në Gjakovë dhe hetimet do të vazhdojnë ndaj gjashtë zyrtarëve policorë në procedurë të rregullt për veprën penale “Keqpërdorim i pozitës apo autoritetit zyrtar”.

Në interes të hetimit, IPK i ka rekomanduar Policia e Kosovës suspendimin e gjashtë zyrtarëve policorë të Njësisë Rajonale të Komunikacionit Rrugor në kuadër të Drejtorisë Rajonale të Gjakovës.

Në një rast tjetër, IPK ka rekomanduar suspendimin e dy zyrtarëve policorë në Gjilan.

Hetimet për këtë rast janë duke u zhvilluar në koordinim me Prokuroria Themelore në Gjilan, në procedurë të rregullt, nën dyshimin për veprën penale “Lajmërim apo kallëzim i rremë”.

IPK ka bërë të ditur se, në konsultim të vazhdueshëm me prokurorinë, pritet të ndërmerren edhe veprime të tjera hetimore për të sqaruar plotësisht rrethanat e të dy rasteve.