7 mijë shisha ujë shpërndahen në Xhamiat e Podujevës nga Fondacioni “Besëlidhja”

Gjatë kësaj jave, Fondacioni Besëlidhja ka realizuar me sukses shpërndarjen e 7,000 shisheve ujë, në kuadër të aktiviteteve humanitare gjatë muajit të bekuar të Ramazanit. Ky aksion synon të ofrojë freski dhe lehtësim për besimtarët gjatë agjërimit, duke reflektuar frymën e solidaritetit dhe kujdesit për njëri-tjetrin.

Shpërndarja e ujit është bërë në nëntë xhami në Podujevë dhe katër të tjera në Prishtinë, aty ku frekuentimi gjatë këtij muaji është më i lartë. Vullnetarët e fondacionit kanë qenë të angazhuar drejtpërdrejt në terren, duke siguruar që ndihma të arrijë tek sa më shumë qytetarë.

Nga Fondacioni Besëlidhja shprehen mirënjohës për të gjithë donatorët që kontribuuan në realizimin e këtij projekti humanitar. “Allahu i shpërbleftë të gjithë ata që u bënë pjesë e këtij aksioni bamirës”, thuhet në njoftimin e fondacionit.

Gjatë muajit të shenjtë të Ramazanit, Fondacioni Besëlidhja do të vazhdojë me projekte të ndryshme në mbështetje të kategorive të ndryshme sociale, me synimin për të rritur mirëqenien dhe për të forcuar ndjenjën e solidaritetit në shoqëri.