25 vjeçarja i jep fund jetës

Postimi i JOQ Albania:

Tragjedia e 25-vjeçares Xhuana Nikollaj e cila u shua nga fotoksina që konsumoi si pasoje e një periudhe të vështirë me partnerin e saj dhunues Eraldo Fizi. nuk është vetëm një histori e dhimbshme personale, por një alarm për të gjithë shoqërinë. Pas ngjarjeve të tilla shpesh fshihet një zinxhir i gjatë dhimbjeje, konflikte në marrëdhënie, dhunë psikologjike apo fizike, izolim emocional dhe ndjenja se askush nuk të dëgjon.

Kur një vajzë e re arrin në një pikë ku jeta duket më e rëndë se shpresa, kjo nuk është vetëm tragjedia e saj, por edhe një pasqyrë e plagëve që ekzistojnë në shoqëri.

Kjo na kujton se dhuna në marrëdhënie nuk fillon gjithmonë me goditje fizike. Shpesh ajo nis me kontroll, fjalë poshtëruese, xhelozi të sëmurë dhe presion psikologjik, derisa viktima humbet besimin tek vetja dhe fillon të ndiejë se nuk ka rrugëdalje.

Familja ka një rol të pazëvendësueshëm. Të rinjtë shpesh hezitojnë të flasin nga frika e paragjykimit, ndaj prindërit duhet të krijojnë një ambient ku fëmijët ndihen të sigurt të ndajnë problemet e tyre. Edhe shoqëria duhet të reflektojë, në vend që të gjykojmë viktimat pas tragjedisë, duhet të pyesim veten nëse kemi krijuar një mjedis ku ato ndihen të sigurta të kërkojnë ndihmë. Meshkujt duhet të jenë pjesë e zgjidhjes, sepse forca e një burri matet me respektin dhe përgjegjësinë, jo me kontrollin.

Ndërsa vajzat dhe gratë duhet të kujtojnë se askush nuk meriton dhunë apo frikë në një marrëdhënie. Kjo tragjedi na kujton një të vërtetë të rëndësishme, heshtja shpesh ushqen dhunën dhe dhimbjen. Prandaj duhet të flasim më shumë për shëndetin mendor dhe marrëdhëniet e shëndetshme.

Ndërkohë që shoqëria sapo kaloi 8 Marsin, ditën e gruas, kjo tragjedi është një kujtesë e dhimbshme se barazia dhe siguria e grave nuk mund të jenë thjesht një festë simbolike. Çdo ditë duhet të jetë një mundësi për të mbrojtur dhe respektuar gratë, për të ndihmuar ata që vuajnë në heshtje.

Qofsh engjëll, Xhuana. Le të gjejë paqe shpirti yt atje ku nuk ka dhimbje, frikë apo lot. Kujtimi yt le të jetë një thirrje që të jemi më të ndjeshëm dhe më të guximshëm për të folur kundër dhunës dhe padrejtësisë. Pushofsh në paqe.