Arratiset nga burgu i Dubravës një i burgosur

Një i dënuar për vrasje është arratisur nga Burgu i Dubravës, pasi nuk është kthyer në institucion pas përfundimit të lejes së fundjavës.

Sipas burimeve nga strukturat e sigurisë, i dënuari ishte duke vuajtur një dënim të gjatë me burgim për një rast të rëndë vrasjeje. Ai kishte përfituar leje fundjave nga burgu, por nuk është paraqitur më në kohën e paraparë për t’u rikthyer në institucion, duke u konsideruar tashmë në arrati.

Rasti lidhet me një vrasje që kishte ndodhur vite më parë në fshatin Grabanicë të Klinës, për të cilën personi në fjalë ishte shpallur fajtor dhe ishte dënuar me burgim afatgjatë.

Pas moskthimit të tij në burg, autoritetet përkatëse janë vënë në kërkim të të arratisurit dhe pritet që policia të ndërmarrë veprime për lokalizimin dhe kapjen e tij.

Rasti ka ngritur shqetësime për sigurinë e dëshmitarëve, ndërsa institucionet përgjegjëse pritet të japin detaje shtesë lidhur me zhvillimet e mëtejme. /PodujevaSot