36 vjeçari i dënuar nga Kosova kapet në Shqipëri

Një 36-vjeçar, i kërkuar nga institucionet e Kosovës për veprimtari të kundërligjshme në fushën e narkotikëve dhe kalim të paligjshëm të kufirit, është arrestuar në Fushë Krujë.

Policia e Shqipërisë ka bërë të ditur se arrestimi është realizuar nga Drejtoria e Forcës së Posaçme Operacionale, në kuadër të fazës së 87-të të operacionit policor të koduar “Operacionalja”.

I arrestuari është shtetasi F. Sh., 36 vjeç, i lindur dhe banues në Fushë Krujë, i cili pritet të ekstradohet drejt Kosovës.

Gjykata e Gjakovës, me vendimin e datës 14 mars 2023, e ka dënuar F. Sh. me 2 vjet burgim dhe 550 euro gjobë, nga të cilat i kanë mbetur për të vuajtur 1 vit, 4 muaj e 10 ditë burgim, për veprat penale “Posedimi i paautorizuar, shpërndarja dhe shitja e narkotikëve, lëndëve psikotrope dhe substancave analoge” dhe “Kalimi i paligjshëm i kufirit”, bëjnë të ditur autoritetet.