Nxënësi i klasës së 9-të hyn në shkollë me thikë

Një incident shqetësues është raportuar në një shkollë fillore në fshatin Xerxë të Rahovecit, ku një nxënës i klasës së nëntë është kapur me mjet të mprehtë brenda ambienteve të shkollës.

Rasti është raportuar rreth orës 14:00, kur drejtori i shkollës ka njoftuar policinë se një nxënës kishte hyrë në objektin shkollor me thikë (armë të ftohtë).

Njësitë policore kanë dalë menjëherë në vendin e ngjarjes dhe kanë bërë konfiskimin e mjetit të mprehtë, ndërsa i mituri është shoqëruar në Stacionin Policor në Rahovec, së bashku me prindin e tij.

I dyshuari, nxënës i klasës së nëntë, është intervistuar në prani të prindit dhe avokatit mbrojtës, sipas procedurave për të mitur.

Në lidhje me rastin është njoftuar Prokurori kujdestar për të mitur, i cili ka urdhëruar inicimin e rastit për “Mbajtje në pronësi, kontroll ose posedim të paautorizuar të armëve/municionit”.

Pas procedurave fillestare, i mituri është liruar në procedurë të rregullt, ndërsa rasti mbetet në trajtim nga organet kompetente.